ប្រភព៖ CEN
ភ្នំពេញ: ជាចេតនាមួយ ចង់បង្ហាញ និងលើកតម្កើង នូវសិល្បៈក្បាច់គុណបុរាណខ្មែរ អោយមានការរីកចំរើន ក៏ដូចជា អោយអន្តរជាតិ ទទួលស្គាល់កាន់តែច្រើនឡើងៗនោះ ថ្មីៗនេះ តារាចម្រៀងឈានមុខ របស់ផលិតកម្មសាន់ដេ លោក ខេមរៈ សិរីមន្ត បានបញ្ចេញនូវបទចម្រៀងរបស់ខ្លួន ចំនួនពីរបទ ដែលសុទ្ធសឹងបង្ហាញ ពីឈុតឆាកវាយប្រហារ ប្រើប្រាស់នូវក្បាច់គុណបុរាណខ្មែរ ដែលក្នុងនោះមានដូចជាបទ “ ស្រលាញ់បងគ្មានអនាគតទេ ” និងបទ “ តឹងទ្រូងស្ទើរធ្លាយ និយាយមិនចេញ ” ។
ហើយជាបន្តបន្ទាប់ តារាចម្រៀងរូបនេះ ក៏គ្រោងធ្វើបទចម្រៀងបែបនេះ បន្ថែមទៀតផងដែរ ដើម្បីជាការលើកស្ទួយ នូវវិស័យកីឡា ជាពិសេសកីឡាប្រដាល់ ក្បាច់គុណបុរាណខ្មែរតែម្តង ដែលកំពុងទទួលការពេញនិយម ពីសំណាក់ទស្សនិកជន ។
ផ្តល់បទសម្ភាសន៍ ជាមួយគេហទំព័រ CEN តារាចម្រៀង ស្ថិតក្នុងដួងចិត្តយុវវ័យ លោក ខេមរៈ សិរីមន្ត បាននិយាយថា សិល្បៈក្បាច់គុណបុរាណខ្មែរ ដែលលោកបានបង្ហាញផ្ទាល់ នៅក្នុងបទចម្រៀង “ ស្រលាញ់បងគ្មានអនាគតទេ ” គឺបានទទួលការគាំទ្រយ៉ាងច្រើន ពីសំណាក់ទស្សនិកជន ព្រោះវាជាចំណីអារម្មណ៍ប្លែក ដែលទស្សនិកជន មិនធ្លាប់បានឃើញពីមុនមក ។
ដោយឡែក សម្រាប់បទថ្មី ក្រោមចំណងជើងថា “ តឹងទ្រូងស្ទើរធ្លាយនិយាយមិនចេញ ” ដែលផ្ទៃរឿង បានបង្ហាញពីសិល្បៈ ក្បាច់គុណបុរាណខ្មែរ ដូចគ្នានេះដែរ មិនទាន់ដឹងថា ជោគជ័យដូចបទមុន ឬយ៉ាងណានោះទេ ខណៈបទនេះ មិនទាន់ចេញលក់ នៅលើទីផ្សារនៅឡើយ ដោយសារទើបតែថតចប់ ។
យ៉ាងណាក៏ដោយ តាមការអះអាង របស់លោក សិរីមន្ត បើទោះជាបទទាំងពីរខាងលើ ទទួលបានការគាំទ្រ ពីទស្សនិកជន ក្នុងកម្រិតណាក៏ដោយ ក៏មិនជាបញ្ហាដែរ ព្រោះបទនេះធ្វើឡើង ដើម្បីចូលរួម លើកតម្កើងនូវសិល្បៈ ក្បាច់គុណបុរាណខ្មែរ អោយមានការរីកចំរើន និងចង់បង្ហាញអោយកូនខ្មែរ ជំនាន់ក្រោយ ក៏ដូចជា អន្តរជាតិបានយល់ និងបានដឹង អំពីភាពអស្ចារ្យនៃ ក្បាច់គុនបុរាណខ្មែរ ដែលបន្សល់ទុក តាំងពីដូនតាប៉ុណ្ណោះ ។
លោក សិរីមន្ត បានបញ្ជាក់ថា កន្លងមក លោកធ្លាប់ទទួលបានជោគជ័យ ម្តងរួចមកហើយ តាមរយៈធ្វើបទចម្រៀង ពាក់ព័ន្ធទៅនឹងវិស័យកីឡាប្រដាល់នេះ គឺបទ “ បេះដូងអ្នកប្រដាល់ ” ដែលកាលណោះ លោកមិនបានចូលរួម សម្តែងផ្ទាល់នោះទេ ប៉ុន្តែសម្រាប់បទថ្មី ដែលទើបនឹងចេញលក់ថ្មីៗនេះ លោកបានចូលរួមសម្តែង ផ្ទាល់តែម្តង ដោយសារលោកបានហាត់រៀន ចេះនូវស្នៀតប្រដាល់ខ្លះៗ ពីសំណាក់គ្រូ មានបទពិសោធន៍ លើផ្នែកនេះ ហើយរូបរាងរបស់លោក ក៏មានអំណោយផលផងដែរ ។
ក្នុងនាមជាតារាចម្រៀងល្បីឈ្មោះម្នាក់ លោក ខេមរៈ សិរីមន្ត បានអះអាងពីការចូលរួម លើកស្ទួយ និងអភិវឌ្ឍន៍វិស័យកីឡាប្រដាល់ ជាមួយរាជរដ្ឋាភិបាល តាមរយៈការឧបត្ថម្ភ ជាទឹកប្រាក់លើកទឹកចិត្ត ដល់កីឡាករ នៅពេលប្រកួតម្តងៗ ក្នុងនោះមានដូចជា កីឡាករ វង្ស ណយ នួន សូរិយា និង វ៉ន វីវ៉ា ជាដើម ដែលធ្លាប់ទទួលការឧបត្ថម្ភពីលោក ។
តារាចម្រៀងមានឥទ្ធិពល នៅក្នុងផលិតកម្មសាន់ដេរូបនេះ បញ្ជាក់ថា “ ដើម្បីអោយអន្តរជាតិ គេចាប់អារម្មណ៍ និងទទួលស្គាល់យើង ទាល់តែយើងយកអ្វី ដែលជារបស់យើង ទៅបង្ហាញគេ ” ដូចអ្វីដែលលោកបានធ្វើ នៅពេលនេះស្រាប់ តាមរយៈការលើកយក នូវស្នៀតប្រដាល់បុរាណខ្មែរជាច្រើន មកបង្ហាញនៅក្នុងបទចម្រៀង ក្នុងន័យអោយបរទេស គេបានដឹង និងយល់អំពីក្បាច់គុណ វ័យចំណាស់របស់ខ្មែរ ដែលជាម្ចាស់ដើម ហើយក៏ជាផ្នែកមួយ ចូលរួមអភិវឌ្ឍន៍សង្គមជាតិផងដែរ៕V/c
