ភ្នំពេញ ៖ រាជរដ្ឋាភិបាលនៃព្រះរាជាណាចក្រកម្ពុជាបានសំរេចយកថ្ងៃទី១០-១១ និងថ្ងៃទី១២ ខែកក្កដា ឆ្នាំ២០១៤ ដើម្បីរៀបចំព្រះរាជពិធីដង្ហែព្រះបរមអដ្ឋិ ព្រះករុណាព្រះបាទសម្ដេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ “ព្រះករុណា ព្រះបរមរតនកោដ្ឋ” នេះយោងតាមសារាចររបស់រាជរដ្ឋាភិបាលកម្ពុជា។
តាមសារាចរណែនាំរបស់រាជរដ្ឋាភិបាលកម្ពុជា ចុះថ្ងៃទី១២ ខែមិថុនា ឆ្នាំ២០១៤ ដែលចុះហត្ថលេខាដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានឲ្យដឹងថា ដើម្បីមានឱកាសចូលរួមសំដែងការគោរពព្រះវិញ្ញាណក្ខ័ន្ធ និងដង្ហែព្រះបរមអដ្ឋិ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុតរាជរដ្ឋាភិបាលនៃព្រះរាជាណាចក្រកម្ពុជាបានដាក់ចេញសារាចរណែនាំមួយចំនួនដូចជា ៖
ទី១- អនុញ្ញាតឲ្យមន្ត្រីរាជការ បុគ្គលិក និយោជិត កម្មករ បានឈប់សម្រាប់រយៈពេល ១ថ្ងៃ គឺនៅថ្ងៃសុក្រ ទី១១ ខែកក្កដា ឆ្នាំ២០១៤ ដើម្បីចូលរួមសំដែងគោរពព្រះវិញ្ញាណក្ខ័ន្ធ និងដង្ហែ ព្រះបរមអដ្ឋិ។
២-គ្រប់ស្ថានីយវិទ្យុ និងទូរទស្សន៍ជាតិ និងឯកជន ព្រមទាំងកន្លែងកំសាន្ដសប្បាយ ត្រូវផ្អាកការផ្សាយនូវទស្សនីយភាពការសម្ដែង និងការប្រគំតន្ត្រីផ្សេងៗដែលមានលក្ខណៈសប្បាយគគ្រឹកគគ្រេង ក្នុងថ្ងៃទី១១ ខែកក្កដា ឆ្នាំ២០១៤ ជាថ្ងៃប្រារព្ធព្រះរាជពិធីដង្ហែ ព្រះបរមអដ្ឋិ។
៣- គ្រឹះស្ថាន អគារសាធារណៈ អគារលក់ដូរគ្រប់ប្រភេទតាមដងផ្លូវដង្ហែ ដែលនៅតាមបណ្ដោយវិថីសម្ដេចព្រះធម្មលិខិតអ៊ុក មហាវិថីព្រះនរោត្តម វិថីព្រះសីហនុ វិថីសម្ដេចសុធារស ត្រូវបញ្ឈប់សកម្មភាពការងារ និងលក់ដូរ នៅថ្ងៃសុក្រ ទី១១ ខែកក្កដា ឆ្នាំ២០១៤ ដើម្បីសម្រួលដល់ការងារចរាចរ។
៤-រាជធានីភ្នំពេញ គ្រប់ខេត្ត គ្រប់ទីប្រជុំជន និងគ្រប់វត្តអារាមក្នុងព្រះរាជាណាចក្រកម្ពុជា ត្រូវចាត់តាំងដោតទង់ជាតិ ទង់សាសនា ទង់ជ្វាលា ប្រារព្ធពិធីបុណ្យតាមប្រពៃណី ដើម្បីថ្វាយព្រះរាជកុសល និងគោរពព្រះវិញ្ញាណក្ខ័ន្ធព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុតនៅតាមប្រពៃណី មានប្រគំភ្លេងពិណពេទ្យ វាយគង ទូងស្គរ ទៅតាមកម្មវិធីកំណត់ ឲ្យបានស័ក្ដិសម នឹងព្រះរាជគុណូបការៈ ដ៏ធំធេងរបស់ព្រះអង្គចំពោះជាតិ សាសនា និងប្រជានុរាស្ត្រកម្ពុជា។
ជាមួយគ្នានោះ សារាចរណែនាំបានណែនាំឲ្យគ្រប់ក្រសួង ស្ថាប័ន គ្រប់អាជ្ញាធរមានសមត្ថកិច្ច អាជ្ញាធរដែនដីគ្រប់លំដាប់ថ្នាក់ គ្រប់មន្ត្រីរាជការ កងកម្លាំងប្រដាប់អាវុធគ្រប់ប្រភេទ ព្រមទាំងជនរួមជាតិ ប្រជាជនទូទាំងព្រះរាជាណាចក្រកម្ពុជា ត្រូវចូលរួមអនុវត្តសារាចរនេះឲ្យមានប្រសិទ្ធភាពខ្ពស់ ដើម្បីជាកិច្ចចូលរួមសំដែងការគោរពដ៏ជ្រាលជ្រៅចំពោះ ព្រះករុណា ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត៕
