ប្រភព: Postkhmer
ភ្នំពេញៈ មានរយៈពេលជិត១ឆ្នាំហើយ តែនៅពេលនេះ គូស្វាមីភរិយាខុសវ័យរវាងពិធីការិនីជើងខ្លាំងអ្នកនាង គង់ សុជាតិ និងពិធីករសម្បូរវោហារ លោក ជា វិបុល នៅតែមិនទាន់អាចរកកំណប់កូនប្រុសស្រីបាននៅឡើយ។ ការរកមិនទាន់ឃើញកំណប់កូនម្នាក់ទុកជាចំណងដៃស្នេហ៍នេះ ត្រូវបានគេដឹងថា មិនមែនអ្នកទាំងពីរអសមត្ថភាពរកមិនឃើញនោះទេ តែការពន្យារពេលនេះដោយសារតែអ្នកនាង គង់ សុជាតិ ជាប់បម្រាមទូរទស្សន៍ស៊ីធីអិន។
នៅជុំវិញចម្ងល់មានផ្ទៃពោះរបស់តារារូបនេះ អ្នកនាង គង់ សុជាតិ បានទទួលស្គាល់ថា នៅពេលនេះ អ្នកនាងមិនទាន់មានផ្ទៃពោះនៅឡើយទេ។ កំពុងស្ថិតនៅលើទឹកដីភ្នំគូលែនដ៏ស័ក្តិសិទ្ធិ។ អ្នកនាង គង់ សុជាតិ បាននិយាយថា៖«ខ្ញុំនិយាយដោយស្មោះត្រង់ ព្រោះនៅលើភ្នំគូលែននេះ ស័ក្តិសិទ្ធិណាស់ គឺខ្ញុំអត់ទាន់មានផ្ទៃពោះនោះទេ»។
នៅពេលនិយាយដល់ការដកឃ្លាយកកូនមិនបាន អាចជាប់ពាក់ព័ន្ធនឹងបម្រាមរបស់ស្ថានីយទូរទស្សន៍ស៊ីធីអិននោះ អ្នកនាង គង់ សុជាតិ ហាក់និយាយលេងសើចលាយឡំនឹងការពិតថា នោះជាចំណែកមួយ ព្រោះនាងកំពុងជាប់កុងត្រាជាមួយនឹងទូរទស្សន៍ស៊ីធីអិនក្នុងកម្មវិធីប្រឡងចម្រៀងដ៏ល្បីឈ្មោះ «សំនៀងចែងចាំង»។
ពិធីការិនីជើងចាស់ប៉ះចំប្តីក្មេងអ្នកនាង គង់ សុជាតិ បាននិយាយបែបលេងសើចថា៖«នៅពេលនេះ ស៊ីធីអិន មិនទាន់ឲ្យខ្ញុំយកកូនទេ (សើច) ព្រោះខ្ញុំជាប់ធ្វើជាពិធីការិនីក្នុងកម្មវិធី សំនៀងចែងចាំង។ ស៊ីធីអិន តែងសុំខ្ញុំ និយាយជាមួយខ្ញុំ សុំខ្ញុំកុំអាលយកកូនអី ចាំចប់កម្មវិធីនេះសិន គឺនៅចុងឆ្នាំនេះ ចប់ហើយ»។
ទោះបីយ៉ាងណា អ្នកនាង គង់ សុជាតិ បានឲ្យដឹងថា នៅមានការងារជាច្រើនទៀត ដែលជាឧបសគ្គក្នុងការលៃពេលយកកូនប្រុសស្រីនោះ។ អ្នកនាងនិយាយថា៖«ក្រៅពីជាប់កម្មវិធីនោះ ខ្ញុំនៅមានការងារជាច្រើនទៀត អ៊ីចឹងហើយទើបមិនទាន់អាចឲ្យពួកខ្ញុំមានពេលគ្រប់គ្រាន់សម្រាកយកកូននោះទេ»។
យ៉ាងណាមិញ គូស្នេហ៍មួយនេះបានបដិសេធចំពោះការលើកឡើងពីការអសមត្ថភាពយកកូនរបស់ពួកគេ។ អ្នកនាង សុជាតិ បញ្ជាក់ថា៖«នេះមិនមែនមកពីខ្ញុំអសមត្ថភាពយកកូនបានទេ តែមកពីប្តីប្រពន្ធខ្ញុំរវល់ខ្លាំងពេក មិនទាន់អាចដកឃ្លាបាន»។ នាងបញ្ជាក់បន្ថែមថា៖«ទាល់តែចប់ចុងឆ្នាំនេះ ទើបយើងមានគម្រោងយកកូន»៕
